Se tés picores, caspa, eczemas na zona capilar,.. ou para o simples cuidado do cabelo, nom deixes de probar a urtiga. Tem umha longa tradiçom na Galiza para atalhar este tipo de problemas e, nalguns casos, o resultado é sorprendente desde a primeira aplicaçom.O jeito mais imediato é preparar um chá bem carregado, um par de litros de auga por dous punhados de urtiga fresca. Fervemos a auga e infudimo-la durante 3-5 minutos. Também podemos utilizar a raiz, para o qual é melhor leva-la ao fervor um par de minutos e deixar repousar outros dez.
Com esta auga podemos humedecer o cabelo e deixar actuar durante umha hora, envolto numha toalha, mas também podemos utiliza-la como auga para o aclarado ou o peiteado.
Outras preparaçoes mais concentradas som a jeito de vinagre ou alcoolatura. Nestes casos, a erva fresca cobre-se de vinagre ou alcool, bem apertadinha, e deixa-se macerar durante 15 dias, aproximadamente. Assim preparada, a sua duraçom é muito maior.
Se imos utilizar alcool, podemos obtar pola receita "tradicional", o augardente, ou bem alcool de farmácia, que nunca se deve utilizar por via interna. Neste segundo caso, podemos rebaixar a graduaçom do alcool a hora de utiliza-lo, misturando com auga, por exemplo numha proporçom 50:50.
Tes mais conselhos sobre estas elaborações aqui.
Deixamos actuar sobre o cabelo este preparado, segundo disponhamos de tempo, ao redor de 1 hora. Logo podemos lavar o cabelo, ou simplesmente aclara-lo. Se optamos por lava-lo, devemos procurar um champô suave e natural. Compre ter em conta que a maior parte dos problemas capilares derivam do uso e abuso dos produtos cosméticos que nos vendem para cuida-lo. Mudar estes hábitos de higiene e os produtos que utilizamos, é fundamental para solucionar estes problemas.
Podemos repetir este tratamento quantas vezes seja necessário, mesmo umha vez ao dia nos casos mais urgentes.
Outras ervas que nos podem ajudar ao cuidado capilar som o romeu e a árnica, que se recomendam conjuntamente para tratar problemas de caída. Em ambos casos recorrere-mos ao mesmo tipo de preparações que no caso da urtiga, ainda que funcionam ambas ervas mui bem preparadas como alcoolaturas.